صراع العقل والواقع ...2

المشــهد الســـابع

حنين أصبحت حآلتها النفسية على صفيح ســآخن ويدور ذاك السؤال فى مخيلتهاآ 

ماذا كنت أفعل هناك خلف باب مكتبة المدرسة ؟!

 أيكون عملى كأخصائى مكتبات مضافاً إليه أعمال التنظيف ؟

كيف سأحقق طموحاتى وأحلآمى ؟ فملابس تكسوها الأتربة أم بمكان تتدنى فيه الأفكار ؟

صارعت كثيراً وقررت أنها لابد وأن تصمد وتكمل مشوارها أيا كآن فلم يكن هناك مكان للندم بعد وطردت شيطان نفسها  ودعت المولى أن ييسر أمورها ويقدم لها الخير الذى كتبه لهآ .

 أشرقت شمس يوم جديد وأعلنت عن يوم جديد بمكتبة المدرسة وذهبت حنين وهى على يقين بأن المولى سبحانه وتعالى سييسر لها امورها ووضعت فى حسبانها أنها ربما تكتشف أمراً أخر أو عملاً مضافاً لها كأخصائى مكتبة حتى لا تنصدم مجدداً فلن تستحمل نفسيتهآ ما يدور حينهآ .

دخلت المكتبة وبدأت فى معرفة كم الأوراق الموجودة والسجلات والملفات والوريقات التى تملأ أدراج "الشانون " وبدأت فى تصفحهم كلِ على حدى وجدت مجموعة السجلات الخاصة بالعام الذى مضــى وكانت كالأتى :- 

1- سجل لجنة المكتبة .

2- سجل أصدقاء المكتبة.

3- سجل المحاضرات.

4- سجل الندوات.

5- سجل المسابقات.

6- سجل المعارض.

7- سجل الإذاعة.

8- سجل الميزانية.

9- سجل المناظرات.

10-سجل التربية المكتبية.

11- سجل التوعية البيئية.

12- سجل الخطة العمل.

 ايه كل السجلات دى ؟! انا مدرستش كدا فى الجامعة ؟ فين التصنيف والفهرسة والتكشيف والتقييم و .... و.... و..... فين اللى انا درسته ؟! :(

وسيطرت عليها حالة من الحزن فليس هناك أحد يجيب تساؤلاتهآ بعد 

 ووجدت مجموعة سجلات تانية كبيرة الحجم ومُجلدة بورق مقوى وفى درج لوحدهم زى :- 

1 – سجل يومية المكتبة .

2 – سجل المترددين على المكتبة .

3 – سجل استعارات المدرسين .

4 – سجل إحصاء النشاط الشهري .

5 – سجل المطبوعات الدورية .

وزادت حيرة حنين ماذا أفعل بهم وكيف انظم العمل بهم ؟
وامسكت بكشكول الأسئلة الخاصة بالموجه كى ترتب له مجموعة أسئلة يجيبها عليهم حينما يزورها فى المرة القادمة وتذكرت رقمه المدون بالكشكول فكرت قليلاً وترددت كثيراً ثم توكلت على الله واتصلت به ..... بيرن ... بيرن ..... اقفل ولا ..لأ ...

وهمت بإنهاء المكالمة وسمعت صوت
:- السلام عليكم ورحمة الله وبركاته .

حنين :- وعليكم السلام ورحمة الله وبركاته . اسفة للإزعاج

الموجه:- لا ازعاج ولا حاجة ، إزيك أ/ حنين ؟

حنين :- الحمد لله بخير وتايهة شويتين :(

الموجه :- ههههههههه ليه بس علشان فى الاول تايهة فى ايه قولى

حنين :- حضرتك سجلات كتيرة انا مدرستش دا فى الجامعة ، تقريباً انا غلطت فى العنوان :(

الموجه :- لا غلطتى ولا حاجة يا استاذة .... شوفى عندك سجلات اسمها السجلات الأساسية موجودة من اول ما المكتبة اتعملت هتلاقيها مُجلدة دى بيتسجل فيها اللى بيدخل المكتبة ومقتنيات متنوعة وكمان المترددين على المكتبة من طلبة ومدرسين

وعندك سجلات فرعية ودى حوالى 23 سجل بيتغيروا تقريبا كل سنة وفى الثابت اللى بيتم التكملة عليه بملاحق 

حنين :- انا عندى 12 سجل مش مجلدين بتوع السنة اللى فاتت وحضرتك بتقول المفروض 23 سجل ولا انا سمعت غلط 

الموجة :- لا مسمعتيش غلط مش كل المكتبات بتعمل الــ 23 سجل فى كمان اللى بيكتفوا بعشرة او 11 ، متستعجليش على رزقك يا أستاذة .

حنين :- انا مش مستعجلة ، انا مصدومة حضرتك  

الموجه :- طيب عايزة تعرفى المكتبة ماشية ازاى وتفهمى لحد ما أجيلك تانى ؟


حنين :- ياريت حضرتك اعمل ايه ؟ 

الموجه :- عندك سجل اسمه الخطة والبرنامج الزمنى شفتيه ؟

حنين :- ايوة فعلا ، موجود اهو

الموجه :- خديه معاكى فى البيت واقرايه وافحصيه كويس هتلاقيه متقسم وفى كل الشغل اللى بيتعمل بالمكتبة فى الدراسة والصيف ، ويومين كدا هاكون فى مدرسة جمبك فاهفوت عليكى بإذن الله  . تمام كدا

حنين :- حاضر إن شاء الله

وأنهت المكالمة ويصرخ فى عقلها سؤال 23 سجل ازاااااااااااااااااااااااى !!

أمسكت بسجل الخطة والبرنامج الزمنى وأخدت كشكول الأسئلة ووضعتهم أمامها وإذا بالأستاذة تهانى تدخل عليها

أ/ تهانى :- ايه ياحنين حد مزعلك ولا إيه ؟

حنين :- لا ليه حضرتك بتقولى كدا !

أ/ تهانى :- يعنى امبارح فضلتى فى المكتبة وكان عزرك بتنفضيها ، النهاردة بقا عزرك ايه ؟

حنين :- لا عذر ولا حاجة دا شغل بحاول افهم الدنيا كانت ماشية ازاى هنا أصلى تايهة حبتين :( 

أ/ تهانى :- بالبركة كله بيعدى والموجه كويس ومحترم مش بيضرب تعالى اقعدى معانا ياستى الشغل مش هيطير

حنين :- لا معلشى هاخلص كدا واجى وراكى

أ/ تهانى :- قومى بس تعالى الجماعة بيقولى عليكى تنكة ومتكبرة عليهم تعالى بقا 

حنين :- حاضر بس هما بيقولوا كدا ليه بس 

أ/ تهانى :- علشانك واخدة جمب منهم ، انت لسة هتحكى تعالى يالا 

قامت حنين وسجل الخطة بيدها وكشكول الأسئلة وقامت معها ، وأغلقت المكتبة وجلست معهم ، وجدت عالم آخر مختلف عن أى ممكن أن تتواجد فيه ، عالم بعيد عن العمل والطموح والآمآل ، عالم تحكمه الكلمات والنميمة والقيل والقال ، عالم تغمره الأكلات وأفعال الجارة هنا وهناك ، عالم ليس عالمها فانشقت عنه بتفكيرها حول لماذا سيكون داخل سجل الخطة ، وأخذت تفكر كيف ستنظم عملها وتحقق طموحها من خلاله ! 

-*-*-*-*-*
الى لقاء آخر مع يومية أخرى الأسبوع القادم بأمر الله تعالى

تصنيف : يوميات أخصائى مكتبات