المشــــــهد الرابــع
اعتقدت حنين انها هتابع عمليه الجرد وتتعلم لكنها فوجئت انها هى اللى هتعمل الجرد بمساعدة أحدهم فقط لا غير، وأمر تشكيل لجنة لعملية الجرد ومحضر جرد والكلام دا عبارة عن ررتين وورق حطومى لا أكثر
حنين :- يافندم ما انا مش عارفة اعمل الجرد ازاى !
المدير:- سهل جدا ... فى رقم عام على الكتاب ورقم عام فى اليومية علمى علامة صح بالقلم الرصاص على اليومية قدام الكتب الموجودة ولما تخلصى اللى مش موجود يتنقل فى ورقة لوحده بعد ما تدورى عليه تانى وتكتب الموجود بالفعل فى محضر الجرد علشان تستلمى فعلى زى ما طلبتى
حنين:- (فى نفسها "بداية العمل صدمات" ربنا يستر) هاعمل دا امتى حضرتك ؟
المدير :- ابدأى من دلوقتى ومعاكى الأستاذة تهانى معلم المسرح هتساعدك كانت بتساعد الأستاذة عبير اللى موجودة اساسا هنا
حنين :- طيب كويس هى هتعرفنى ازاى الاستاذة عبير كانت شغاله لحد ما افهم البحر دا اوله فين
المدير :- بحر ايه ؟!
حنين :- انا قلت بحر ....! اه اقصد العهدة يعنى
تحركت حنين للمكتبة ومعاها الاستاذة تهانى ووكيلة النشاط ... وبدأوا معركة الجرد مع بعض ، بعد عمليه شرح بسيطة من الاستاذة تهانى على اللى كانت بتعمله مع الاستاذة عبير كمساعدة من حين لآخر
وفى اليوم التالت من عملية الجرد اللى تقريباً طولت من وجهة نظر حنين ، دخل رجل مع مدير المدرسة وألقى التحية
المدير:- الأستاذ أحمد الموجه بتاعك يا حنين
أ/ أحمد :- ازيك يااستاذة عاملة ايه ؟
حنين :- الحمد لله بخير اتفضل حضرتك
تعرف الموجه على حنين ببعض الأسئلة عن دراستها وسنة تخرجها وليه هى عايزة تشتغل وأخذ بياناتها وكتبها فى أجندة معاه فهمت حنين إنه بيعمل قاعدة بيانات للأخصائيين اللى بيشرف عليهم وسألها الموجه عن رايها المبدأى فى المكتبة
أجابته :- مقدرش احكم عليها وخصوصا انى كنت متوقعة صورة معينة وملقتهاش فصعب انى احكم دلوقتى بعد فترة اقدر اجاوب حضرتك
أكملت - شكل فى حاجات كتيرة روتينة فى الشغل انا دراستى كانت فنية فهرسة تصنيف تكشيف تقييم مراجع الخ ... موضوع المحاضر والجرد وعرفت ان فى سجلات كتيرة شفت مجموعة منها .. فبعد اذن حضرتك . هو انا المفروض هاشتغل ايه بالضبط ؟!
الموجه مبتسماً :- انتى هتكونى أخصائى مكتبة هنا مسئولة عن المكتبة دى ... وتدخلى فصولك كل فصل مرة فى الاسبوع وتعملى عملية الفهرسة والتصنيف والتكشيف وتعملى محاضرات وندوات ومناظرات واستعارات طلبة ومدرسين واذاعة وترميم ان لزم الامر وتشترى كتب كل سنة من الميزانية وتعملى اجتماعات للجنة المكتبة ولجماعة أصدقاء المكتبة هههههههههههههه كفاية كدا ولا أكمل يا استاذة
حنين:- هو فى كمان ؟! الحاجات دى كلها هاعملها امتى ؟!
الموجه :- اللى عايز يعمل بيعمل اكتر من كدا المهم انك هتفهمى كل دا واحدة واحدة وبالتدريج هتعملى كل المطلوب منك ويمكن تعملى اكتر
حنين :- معتقدش انى هاعمل اكتر من كدا ... ربنا يستر
الموجه :- ونعم بالله ... نبدأ بسم الله اول حاجة لازم تفهميها بتعمل ازاى اللى هى الجرد اللى انتى بتعمليه دا
حنين :- طيب استنى ثانية هاجيب كشكول اسجل اللى حضرتك هاتقولوا ليا علشان يكون مرجع ارجع له لو نسيت ، تمام اهو اتفضل حضرتك
-*-*-*-*
نلتقى الجمعة القادمة بإذن الله تعالى
0 التعليقات:
إرسال تعليق
مَا يَلْفِظُ مِن قَوْلٍ إِلَّا لَدَيْهِ رَقِيبٌ عَتِيدٌ